A wani muhimmin taro na tsare-tsare da aka gudanar a Kachia, shugaban karamar hukumar ya hada manyan masu ruwa da tsaki da suka hada da Mataimakin Sufeto Janar na ‘yan sanda (DIG), Shehu Nadada, Shugabar Ma’aikatan Jihar Kaduna, Hajiya Jummai Bako, sarakunan gargajiya, shugabannin al’umma da wakilan matasa. Taron ya mayar da hankali ne kan samar da hanyoyin hadin kai domin magance matsalolin tsaro da ke addabar yankin.
Wannan taro ya zo ne bayan karuwar matsalolin tsaro a wasu sassan Jihar Kaduna, musamman bayan harin da aka kai a kauyen Ariko, wanda ya kara tayar da hankulan jama’a. Sakamakon hakan, Sufeto Janar na ‘yan sanda, Olatunji Disu, ya bayar da umarnin cewa DIG Shehu Nadada ya koma Jihar Kaduna domin jagorantar ayyukan tsaro da nufin dawo da zaman lafiya.
Da yake jawabi a wajen taron, Dakta Maigari ya jaddada muhimmancin hadin kai da daukar nauyin tsaro a matsayin alhakin kowa da kowa. Ya bayyana cewa babu wata hukuma guda daya da za ta iya magance matsalar rashin tsaro ita kadai ba tare da hadin kan sauran bangarori ba.
Ya ce, “Tsaro alhakin kowa ne. Dole ne mu hada kai—gwamnati, hukumomin tsaro, sarakunan gargajiya da matasa—domin tabbatar da zaman lafiya a cikin al’ummominmu. Ba tare da zaman lafiya ba, ba za a samu ci gaba mai dorewa ba.”
Shugaban karamar hukumar ya sake jaddada kudirin gwamnatinsa na tallafawa hukumomin tsaro da kayan aiki da kuma cikakken hadin kai domin yakar masu aikata laifuka. Ya kuma bukaci al’umma da su rika bayar da sahihan bayanai ga jami’an tsaro a kan lokaci, yana mai cewa bayanan sirri na da matukar muhimmanci wajen hana aukuwar laifuka.
Dakta Maigari ya kara da cewa gwamnatinsa na kokarin inganta shugabanci da samar da ayyukan ci gaba ga al’umma, yana mai cewa zaman lafiya shi ne ginshikin duk wani ci gaba.
A nata bangaren, Shugabar Ma’aikatan Jihar Kaduna, Hajiya Jummai Bako, ta yaba da wannan mataki na shugabannin karamar hukumar Kachia, tana mai cewa lokaci ya yi da ya dace a dauki irin wannan mataki duba da halin tsaro da ake ciki.
Ta kuma tabbatar da cewa gwamnatin jihar za ta ci gaba da bada goyon baya ga dukkan shirye-shiryen da ke inganta zaman lafiya da tsaro, tare da tabbatar da cewa ayyukan gwamnati sun kai ga al’umma a matakin kasa.
Shi ma DIG Shehu Nadada ya bayyana muhimmancin hadin kai da al’umma wajen tabbatar da tsaro. Ya ce hukumomin tsaro na bukatar sahihan bayanai daga jama’a domin gudanar da aikinsu yadda ya kamata.
Ya ce, “Dole ne jama’a su dauki kansu a matsayin abokan hulda wajen yaki da rashin tsaro. Bayanan sirri na taimakawa wajen hana hare-hare da kuma sa jami’an tsaro su dauki matakin gaggawa.”
Ya kuma tabbatar wa da jama’a cewa rundunar ‘yan sanda da sauran hukumomin tsaro za su kara kaimi wajen dawo da zaman lafiya a yankin, ta hanyar kara sintiri da gudanar da ayyukan hadin gwiwa.
Sarakunan gargajiya da wakilan matasa da suka halarci taron sun yi alkawarin bada cikakken goyon baya ga wannan shiri, tare da kira ga jama’a da su guji duk wani abu da zai kawo cikas ga zaman lafiya.
An kammala taron da sabunta kudirin hadin kai tsakanin dukkan bangarorin domin tabbatar da dorewar zaman lafiya a Karamar Hukumar Kachia. Ana ganin irin wannan mataki zai zama abin koyi ga sauran kananan hukumomi wajen magance matsalolin tsaro.